Termat dhe Kushtet Ligjore

Kontratë me abonentët

Termat dhe kushtet e përgjithshme të kontratës

Përkufizime të kontratës

Produkt televiziv

Shërbimi që Operatori i ofron abonentëve si transmetim audioviziv, kundrejt çmimit përkatës të vendosur në varësi të kategorive të programeve të zgjedhura nga përdoruesi.

Aparati marrës

Pajisje që konsiston në marrjen e sinjalit të transmetimit audioviziv dhe përdorimin e aplikimeve të reja në lidhje me programet audiovizive. Është i pajisur me telekomandë shumë i ngjashëm me atë të televizorëve të zakonshëm.

Karta smart

Karta e cila bën të mundur kalimin e sinjalit të transmetimit audioviziv në aparatin e përdoruesit-abonent, që blihet së bashku me aparatin marrës në momentin e lidhjes së kontratës me Operatorin.

Terma të përgjithshëm

Kjo marrëveshje lidhet me vullnetin e plotë dhe të lirë të të dyja palëve për përcaktimin e termave, të drejtave dhe detyrimeve, dhe anasjelltas, në kuptim të zbatimit të tyre në përputhje me ligjin Nr. 97/2013, datë 04.03.2013 "Për Mediat Audiovizive në Republikën e Shqipërisë", ligjin Nr. 9887, datë 10.03.2008 "Për Mbrojtjen e të Dhënave Personale" dhe ligjin Nr. 9902, datë 17.04.2008 "Për Mbrojtjen e Konsumatorëve", Ligjin 35/2016 "Për të Drejtën e Autorit dhe të Drejta të Tjera të Lidhura me Të", ndryshimet e aplikuara kohë pas kohe mbi këto ligje, si dhe në përputhje me dispozitat e Kodit Civil të Republikës së Shqipërisë.

Shoqëria "Tring TV" Sh.a, regjistruar me Vendimin e Gjykatës së Rrethit Gjyqësor Tiranë Nr. 32591, datë 20.12.2004, e cila kryen aktivitetin e saj në transmetimet audiovizive në Shqipëri, më poshtë referuar si Tring TV.

Përdorues-abonent janë të gjithë personat fizikë dhe juridikë që lidhin kontratë me Tring TV, për të bërë të mundur përfitimin e shërbimit të transmetimit audioviziv vetëm për përdorim vetjak.

Objekti i kontratës

Ofrimi i produktit për përdoruesin kundrejt blerjes së aparatit marrës, kartës Smart Tring dhe kartës së abonimit.

Lidhja me sistemin

Çdo person fizik apo juridik, pasi ka blerë pranë agjencisë përkatëse aparatin marrës dhe/ose kartën Smart Tring, si dhe ka nënshkruar këtë kontratë, kthehet në përdorues të shërbimeve audiovizive menjëherë pasi të ketë lidhur aparatin marrës (përfshirë kartën Smart Tring) me aparatin e tij.

Karta smart Tring aktivizohet brenda pak orësh nga momenti i shitjes.

Për të bërë të mundur përfitimin e sinjalit të transmetimit audioviziv, përdoruesi duhet të blejë kartën e abonimit pranë pikave të autorizuara të shitjes. Abonimi me anën e SMS-ve kryhet në momentin që SMS-të arrijnë në serverat e kompanisë.

Mënyra e pagesës

Blerja e produktit audioviziv kundrejt pagesës, në dyqanet Tring sipas ofertave të lançuara nga Tring TV, ose nëpërmjet kalimit të pagesës në numrat e llogarisë bankare të shoqërisë.

Transporti dhe detyrimet doganore

Tarifa e transportit brenda dhe jashtë Shqipërisë përllogaritet dhe shfaqet në mënyrë transparente në momentin e blerjes online. Kjo tarifë mbulon vetëm kostot e dërgimit nga vendi i origjinës deri në vendin e destinacionit, sipas shërbimit të zgjedhur të transportit.

Kujdes: çdo detyrim shtesë që lidhet me doganën, TVSH-në, taksat lokale, tarifat e përpunimit doganor apo çfarëdo tarife tjetër që aplikohet nga autoritetet e vendit pritës nuk përfshihet në çmimin e transportit dhe është përgjegjësi e blerësit. Këto kosto varen nga legjislacioni në fuqi në vendin ku dërgohet porosia dhe mund të ndryshojnë në varësi të kategorisë së produktit, vlerës së porosisë dhe politikave të doganës lokale.

Ju rekomandojmë të kontaktoni autoritetet doganore të vendit tuaj për më shumë informacion përpara se të bëni porosinë.

Ne nuk mbajmë përgjegjësi për vonesa në dorëzim që shkaktohen nga proceset e zhdoganimit, mbajtja e pakove nga autoritetet apo ndalesa të papritura në transportin ndërkombëtar.

Afatet dhe përgjegjësitë e dorëzimit

Porositë përpunohen brenda 24–48 orësh nga momenti i konfirmimit të pagesës. Koha totale e dërgimit mund të variojë në varësi të destinacionit dhe operatorit logjistik të zgjedhur.

Blerësi është përgjegjës për dhënien e informacionit të saktë të adresës së dërgimit. Në rast të një adrese të pasaktë ose të paplotë, shitësi nuk mban përgjegjësi për vonesa, kthime ose humbje të pakove.

Të gjitha pakot dërgohen me një numër ndjekjeje ("tracking number"), i cili do t'i dërgohet blerësit sapo porosia të jetë nisur.

Refuzimi i pakos dhe kthimi i detyruar

Në rast se blerësi refuzon të pranojë pakon në momentin e dorëzimit (p.sh. për shkak të mospagimit të detyrimeve doganore, ndryshimit të mendjes apo ndonjë arsye tjetër), paketa do të kthehet automatikisht te shitësi. Në këtë rast:

• Të gjitha shpenzimet që lidhen me dërgesën fillestare, kthimin e pakos dhe çdo tarifë shtesë që mund të lindë gjatë procesit të kthimit janë përgjegjësi e blerësit dhe nuk rimbursohen.
• Blerësi mund të marrë rimbursim vetëm për vlerën e produktit, nëse ky kthehet në gjendje të rregullt, pas zbritjes së të gjitha kostove të mësipërme. Në disa raste kostot mund të jenë sa vlera e produktit dhe mund të mos procedohet me asnjë rimbursim.
• Në rastet kur pakoja nuk kthehet fare te shitësi (p.sh. shkatërrohet ose konfiskohet nga autoritetet), rimbursimi nuk garantohet.

Kushtet e mësipërme janë pranuar paraprakisht në momentin e kryerjes së pagesës dhe për këtë nuk ka dhe nuk do të ketë asnjë pretendim.

Njohja e kushteve nga përdoruesi

Përdoruesi është plotësisht në dijeni të kushteve të kësaj kontrate dhe pranon që përdorimi i shërbimit prej tij duhet bërë në përputhje me udhëzimet përkatëse të Tring TV dhe legjislacionit përkatës në fuqi.

Të drejtat dhe përgjegjësitë e Tring TV-së

• Tring TV detyrohet të njoftojë përdoruesin, para nënshkrimit të formularit tip, mbi kushtet e përgjithshme të kontratës, mbi mënyrën e dhënies së shërbimit (afati, çmimi etj.), rregullat e përdorimit të aparatit marrës dhe të kartave Smart, abonimit, si dhe lidhjen e aparatit për transmetim audioviziv dhe zonën e mbulimit të shërbimit në fjalë.
• Tring TV detyrohet të shqyrtojë, në një kohë të përshtatshme, çdo ankesë të përdoruesit që ka të bëjë me shërbimin e ofruar apo pajisjet e shitura.
• Tring TV detyrohet ta shoqërojë marrësin me materiale shpjeguese në shqip, si manuale përdorimi, fletëpalosje, dhe vë në dispozicion numrat e informacionit dhe kujdesit për abonentin. Ofron një garanci të përshtatshme në kohë për pajisjen me aparat marrës, kartën smart Tring apo atë të abonimit mujor, sipas standardeve europiane të pajisjeve elektronike, duke siguruar asistencën e nevojshme teknike për të gjithë periudhën e garancisë sipas kushteve të përcaktuara në këtë kontratë. Ajo nuk merr përsipër asnjë dëmtim të shkaktuar nga ndonjë shok elektrik apo agjent tjetër të jashtëm, apo të shkaktuar me faj ose pakujdesi nga përdoruesi, apo si rezultat i ndërhyrjes në këto pajisje nga persona të paautorizuar.
• Tring TV u ofron përdoruesve shërbimin e kujdesit ndaj abonentit me operator të dedikuar, në afate kohore të arsyeshme. Tring TV detyrohet që të ofrojë shërbim të paktën për 90% të periudhës së abonimit. Në rast ndërprerje më të gjatë të sinjalit, dhe për shkak të kësaj, Tring TV duhet t'ia zëvendësojë këtë tejkalim kohe përdoruesit nëpërmjet abonimit pa pagesë.
• Tring TV nuk mban përgjegjësi në rast të kalimit të së drejtës së përdorimit nga ana e përdoruesit tek të tretët.

Të drejtat dhe përgjegjësitë e përdoruesit

• Të përdorë aparaturën dhe kartat vetëm sipas udhëzimeve të dhëna nga Tring TV dhe manualit të përdorimit.
• Të përdorë vetëm karta abonimi të shpërndara nga Tring TV në pikat e saj të autorizuara.
• Të mos përdorë dhe të mos lejojë persona të tretë të përdorin shërbimin e ofruar nga shoqëria për qëllime që bien ndesh me moralin dhe me ligjin.
• Të mos përdorë dhe të mos lejojë persona të tretë të përdorin shërbimin e ofruar në ambiente publike (vende që synojnë mbledhjen e publikut), duke përfshirë klube, restorante, qendra të llotarive sportive, hotele etj., përveçse në rast të një autorizimi apo kontrate të posaçme të dhënë nga Tring TV.
• Ndalohet çdo veprim kopjimi dhe shitje pirate e kartave smart dhe atyre rimbushëse.
• Nuk lejohet tjetërsimi i aparatit marrës dhe kartës smart Tring dhe/ose i sinjalit të përftuar prej tyre.

Ruajtja e fshehtësisë dhe përdorimi i të dhënave personale

Tring TV do të mbledhë, përpunojë e përdorë të dhënat personale të abonentit për përmbushjen e kësaj kontrate, për qëllimet e lejuara të biznesit të përcaktuara nga Tring TV. Duke nënshkruar këtë kontratë, abonenti pranon që Tring TV të përpunojë të dhënat e tij për qëllime të parashikuara nga legjislacioni në fuqi, ku përfshihen (por nuk kufizohen vetëm me to) përpunimi i kërkesave për dhënien e shërbimeve dhe produkteve abonentit, mbajtja e llogarive të transaksioneve, përgatitja e faturave dhe dhënia e shërbimit të kujdesit për abonentin, kontrolli dhe raportimi i kreditit, krijimi dhe mbajtja e bazave të të dhënave dhe platformave të shërbimit, kryerja e analizave e studimeve për informacion biznesi dhe qëllime marketingu, profilizimi i abonentit, zhvillimi i produkteve dhe shërbimeve, ristrukturimi apo riorganizimi i biznesit të Tring TV. Tring TV ose agjentët e tij mund që, herë pas here, të kontaktojnë abonentin nëpërmjet postës, telefonit, email-it apo SMS-ve në lidhje me shërbimin e ofruar dhe të pranuar nga abonenti (p.sh., por jo kufizuar në: furnizimi i shërbimit të asistencës ose sekretarisë telefonike, gjendja e marrjes së mesazheve ose të pagesave, bllokimi i kartës etj.). Me pëlqimin paraprak të abonentit, Tring TV mund ta kontaktojë atë nëpërmjet postës, telefonit, email-it apo SMS-ve në lidhje me detajet e shërbimeve dhe produktet e reja që Tring TV ofron. Në rast se abonenti vendos të mos marrë komunikime të kësaj natyre, mund ta kërkojë këtë në çdo moment dhe pa pagesë, duke kontaktuar Shërbimin e Abonentit për të bërë ndryshimet përkatëse. Me pëlqimin paraprak të abonentit, Tring TV mund të publikojë një ose disa nga të dhënat e tij, ose t'ia kalojë këto të dhëna për publikim çdo operatori tjetër publik.

Mbarimi dhe zgjidhja e kontratës

Kontrata përfundon me pëlqimin e të dyja palëve në çdo kohë, por ajo mund të zgjidhet në mënyrë të njëanshme nga ana e Tring TV kur konstatohen veprime të ndaluara nga udhëzuesi i përdorimit të aparatit marrës dhe të kartave Smart e rimbushëse, apo veprime kopjimi dhe shkelje të së drejtës së autorit.

Në raste të tilla, Tring TV vepron pa njoftuar më parë përdoruesin, duke ndërprerë lidhjen e bërë.

Kontrata përfundon gjithashtu në rast të prishjes së shoqërisë dhe likuidimit të saj.

Forca madhore

Tring TV nuk mban përgjegjësi ndaj përdoruesit-abonent për shkeljen e kushteve të kontratës ose pamundësinë e përmbushjes së detyrimeve në rrethanat e forcës madhore.

Konsiderohen forcë madhore: lufta (e shpallur ose jo), trazirat, sabotimi, fatkeqësitë natyrore, tërmetet, shpërthimet, zjarri, embargot tregtare, grevat; aktet e autoriteteve shqiptare apo të huaja me fuqi ekzekutive; shkeljet e ligjeve nga ana e autoriteteve shtetërore apo personave të tjerë që ushtrojnë aktivitet në fushën televizive.

Zgjidhja e mosmarrëveshjeve

Çdo mosmarrëveshje që mund të lindë nga interpretimi ose zbatimi i kushteve të kësaj kontrate midis dy palëve, do të zgjidhet me bisedime dhe mirëkuptim të ndërsjellë midis palëve, në përputhje me legjislacionin shqiptar në fuqi.

Kur midis palëve nuk arrihet zgjidhja e çështjeve me mirëkuptim dhe kontrata shkelet nga njëra palë, pala tjetër i drejtohet për zgjidhje Gjykatës së Rrethit Gjyqësor Tiranë.

Hartimi i kontratës

Kontrata hartohet në dy kopje të barasvlefshme. Secila prej tyre ka përmbajtje të njëjtë ligjore dhe secila palë do të mbajë një kopje.

Njoftime

Çdo njoftim për ndryshim të kushteve dhe termave të kësaj kontrate, kërkesë apo çdo lloj komunikimi i lejuar për t'u dhënë në bazë të kësaj kontrate ndërmjet palëve, do të bëhet me email ose me shkrim në adresat e mëposhtme, duke pasur parasysh që të dërgohet sa më shpejt:

Të dhënat e abonentit

Hyrja në fuqi e kontratës

Kjo kontratë fillon efektet e saj nga momenti i nënshkrimit midis palëve.